73 Degree Films
Cwmni cynhyrchu fideo yn Wrecsam yw 73 Degree Films. Fe'i sefydlwyd ym mis Mai 2017 gan Robert Corcoran, sydd wastad wedi bod ag angerdd dros greu ffilmiau.
Rwyf i wedi bod yn creu ffilmiau ers pan oeddwn i'n 10 oed, pan gefais fenthyg camcorder fy nhaid
Er na wnes i ddim astudio creu ffilmiau yn y brifysgol, roeddwn i am gael swydd ym maes y cyfryngau neu ffilm, felly dechreuais wneud fy mheth fy hun. Mae 73 Degree Films wedi esblygu llawer; roeddwn i'n arfer cynhyrchu cynnwys newyddion ar gyfer y sianel deledu leol yn Wrecsam, ond nawr rwy'n gwneud prosiectau ar draws digidol, ffilm, cyfryngau a chynhyrchu.
Gwelais sgwrs ar Facebook am greu ffilmiau fertigol, oedd wir yn ysbrydoliaeth
Rhannodd Facebook eu siom am y diffyg diddordeb ac arloesi yn ymwneud â chreu ffilmiau fertigol. Ysbrydolodd y sgwrs fi i greu rhywbeth fertigol a allai wthio'r ffiniau. Fe es i ati i greu tair ffilm a allai uno gyda'i gilydd i redeg fel un ffilm sgrin hollt driphlyg neu fel ffilmiau ar wahân ar ffôn symudol yn fertigol. Wrth i mi eu golygu, soniodd rhywun wrthyf i am Clwstwr.
Cefais arian sbarduno i weld a allai creu ffilmiau fertigol weithio y tu allan i'r cyfryngau cymdeithasol
Er mwyn ymchwilio i'r potensial ar gyfer y cyfrwng, rhennais fy ymchwil a datblygu yn dri nod: 1. Cwblhau'r gwaith ôl-gynhyrchu ar y ffilmiau roeddwn i wedi'u creu, oedd tua 2.5 munud yr un; 2. Defnyddio'r ffilmiau cyflawn i greu prototeipiau, lle'r oedd modd eu gwylio mewn gwahanol ffyrdd; 3. Cynnal profion defnyddwyr, gyda phobl yn gwylio'r prototeipiau ac yn rhoi adborth i ni.
Penderfynwyd ar bedwar fformat i arbrofi gyda nhw
Er mwyn profi gwahanol ffyrdd posibl o ddefnyddio'r ffilmiau fertigol, es ati i wneud pedwar fersiwn o'r un tair ffilm. Byddai un yn cael ei weld mewn penset realiti rhithwir, un mewn rhaglen symudol bwrpasol gan ddefnyddio ystumiau newydd, un trwy arddangosfa ryngweithiol ac un trwy deledu. Cymysgwyd y sain ar wahân ar gyfer pob ffilm fertigol, gan wneud yn siŵr na fydden nhw'n amharu ar ei gilydd wrth gael eu chwarae gyda'i gilydd. Gweithiais ar greu'r prototeip teledu a'r prototeip arddangos rhyngweithiol, yna gweithiais gyda chwmni Jam o Gaerdydd ar y rhaglen symudol a'r fersiwn VR.
Roedd y profion defnyddwyr yn anoddach nag yr oeddwn i wedi’i ddisgwyl
Oherwydd amgylchiadau y tu hwnt i'n rheolaeth, doedd dim modd cael pobl i brofi'r arddangosfa ryngweithiol. Ond doedd hynny ddim yn mynd i'n rhwystro ni. Roedd gennym ni grŵp amrywiol o 10 cyfranogwr, a gofynnwyd cwestiynau i bob un cyn ac ar ôl gwylio'r ffilmiau prototeip eraill. Roedd y nifer fach o gyfranogwyr yn ei gwneud hi'n haws gwneud ymchwil ansoddol yn hytrach na meintiol.
Mwynhaodd bron pawb y prototeip VR
Y ffordd roedd y prototeip yn gweithio oedd eich bod mewn amgylchedd gyda'r ffilmiau'n chwarae'n fawr iawn mewn 2D. Wrth i chi droi eich pen, yn dibynnu ar ba ffilm rydych chi'n ei hwynebu, mae'r sain yn croesi. Gallwch chi newid pa gymeriad rydych chi'n ei ddilyn drwy edrych o gwmpas. Cafodd dderbyniad da, ond mae gen i bryderon mai mwynhau newydd-deb ffrydio mewn VR oedd yn difyrru rhai o'r cyfranogwyr yn bennaf.
Dywedodd y rhan fwyaf y gallen nhw ddychmygu bod prototeip y cais symudol yn fasnachol hyfyw
Nododd pobl ei fod yn blatfform llawer mwy hygyrch na VR. Doedd rhai cyfranogwyr ddim yn hoffi eich bod yn gallu sweipio rhwng y cymeriadau a dilyn eu fersiwn nhw o'r stori. Pan fyddwch chi'n sweipio o un cymeriad, mae'r cymeriadau eraill yn dal i chwarae - dydyn nhw ddim yn aros i chi ddal i fyny. Roedd rhai cyfranogwyr yn teimlo eu bod yn ofni colli allan ar beth oedd yn digwydd yn y ffilmiau roedden nhw wedi sweipio oddi wrthyn nhw. Rwy'n credu y byddai angen mwy o opsiynau i'r gynulleidfa mewn fersiwn o'r cynnyrch hwn yn y dyfodol.
Profodd y prosiect Clwstwr cyntaf hwn fod achos dros wneud fideo fertigol yn amlswyddogaethol
Mae gan bob prototeip ei lwybr posibl ei hun at ddod yn hyfyw yn fasnachol. Gallem ddewis gweld i ble y gallai unrhyw un o'r pedwar prototeip fynd. Fodd bynnag, ar yr un pryd, roeddwn i'n edrych ar y datblygiadau sy'n codi mewn rhai technolegau a allai ategu'r hyn roeddem ni'n ei wneud gyda fideo fertigol. Un o'r rhain oedd technoleg blockchain a'r ffyrdd y gallwch chi docyneiddio pethau ar blockchain.
Cyfyng-gyngor cyffredin i wneuthurwyr ffilm a chrewyr digidol yw eu bod yn creu pethau sydd yn y bôn yn fynediad agored; maen nhw'n cael eu postio ar-lein a'u gweld am ddim. Mae hyn yn golygu bod perchnogaeth ac elwa o'u gwaith yn aneglur. Roeddwn i wedi treulio cymaint o amser yn edrych ar gynnwys fertigol, sy'n tueddu i fyw ar gyfryngau cymdeithasol, roeddwn i am edrych ar sut i'w gyfuno â thechnolegau eraill i wneud arian o gynhyrchion digidol o'r fath. Roedd gen i ddiddordeb mawr mewn NFTs (tocynnau anghyfnewidiadwy); gall artist greu tocyn ar gyfer eu cynnwys digidol, y gellir ei werthu a'i ailwerthu a chreu gwerth ariannol. Sbardunodd hyn y cyfnod ymchwil a datblygu nesaf.
Cefais arian prosiect i ddatblygu llwyfan ymarferol i rymuso crewyr drwy blockchain
I ddechrau roeddwn i am ganolbwyntio ar greu cymhwysiad oedd yn gartref i gynhyrchion crewyr digidol, gan gynnwys fideos fertigol, a dysgu sut i wneud arian o'r cynnwys hwnnw. Cawsom broblemau sylfaenol o'r dechrau: ble ydych chi'n storio'r ffeiliau? Sut ydych chi'n cael digon o led band? Ydy'r data'n cael ei storio'n breifat? Roedd angen cynllun arnaf i.
Rhennais y prosiect yn ddwy is-ran, gyda'r gyntaf yn canolbwyntio ar NFTs
Yn y rhan gyntaf, dysgais gymaint ag y gallwn am NFTs trwy greu casgliad o'r newydd. Fe ddysgodd lawer i mi, fel sut i ysgrifennu'r cod, sut i ddewis blockchain, sut i gysylltu rhwng artistiaid a datblygwyr a sut i wneud celf fel NFTs. Gyda phobl greadigol eraill, creais waith celf yn cynnwys 208 o ddarnau. Wrth i ni greu gwaith celf, roedd y datblygwr yn adeiladu'r rhan gefn gan roi'r darnau celf ar blockchain.
Yr ail ran oedd creu'r platfform ei hun
Ar ôl trafodaethau gyda PDR, fy nghynhyrchydd Clwstwr Gavin a rhai pobl eraill oedd wedi bod yn rhan o'r prosiect, penderfynais edrych ar greu rhywbeth mwy tebyg i blatfform ffrydio ar gyfer ffilmiau byr. Roedd yn fwy arbenigol a byddai'n rhoi mwy o reolaeth i ni dros yr hyn y byddem ni'n ei wneud, ei guradu a storio data.
Nawr fod y gwaith datblygu wedi'i wneud, rwy'n gobeithio ei brofi'n fyw
Creon ni'r casgliad hwn, dysgu sut roedd yn gweithio, creu platfform ar ei gyfer a'i weithredu ar rwydwaith brawf i weld os a sut y byddai'n gweithio. Dysgon ni gymaint. Rydym ni wedi cynnal cyfarfodydd gyda buddsoddwyr, oedd yn gadarnhaol. Mae'r consensws cyffredinol ynghylch cryptoarian ar hyn o bryd yn un o bwyll, felly nid dyma o reidrwydd yw'r amser iawn i'w lansio. Rwy'n gobeithio y gallwn ei agor i'r cyhoedd ymhen ychydig flynyddoedd fel rhyw fath o ŵyl ffilm blockchain rithwir, lle gall pobl brynu mynediad i'r ffilmiau dros gyfnod penodol o amser. Mae'n rhywbeth cyffrous i weithio tuag ato.